Сите сме слушнале за безбедно сексуално однесување, но некои од нас сеуште ризикуваат!
На ден 28.06.2019 година беше спроведена едукативна работилница, во соработка со Ј.З.У “Центар за јавно здравје“-Прилеп и д-р Аксиња Гарбеска- Кебакоска, со цел информирање на младите за повеќе прашања од сексуалното и репродуктивното здравје.
На средбата беа присутни 16 лица, во поголем број тинејџери, на кои пралелно им беше поделен промотивен материјал – флаер и брошура со корисни информации темата. На самата работилницата се зборуваше за контрацепцијата, односно што претставува и зошто треба да се користи, кои контрацептивни средства се најсоодветни за употреба од страна на младите и какви видови постојат. Исто така, се зборуваше подетално и за сексуално преносливите инфекции (СПИ), колку видови има, кои се најчестите сексуално преносливи инфекции, како се пренесуваат и како да се заштитиме од истите. Посочени беа и штетните последици по здравјето особено кај младите кои ги предизвикуваат, како и за симптомите кои ги манифестираат.


Редовните гинеколошки прегледи имаат за цел рано откривање на одредени промени и навремена интервенција. Затоа, истакната беше важноста девојките и жените редовно да прават превентивни прегледи, а оние кои се сексуално активни и ПАП-тестови. Во прилог на ова се зборуваше за едно од најчестите заболувања кај нас и во светот -рак на грлото на матката, ризик факторите, симптомите како и превенцијата. Статистиките покажуваат поразителни бројки на заболени и смртни исходи. Затоа е од животна важност секоја жена да направи гинеколошки преглед барем еднаш годишно.
Дополнително се зборуваше и за тоа што ако се случи несакана бременост. Нормално е да се чувствува збунетост и страв, па затоа истакната беше потребата во тој момент од разговор со луѓето на кои им веруваме, со цел да се донесе правилна одлука. Во одредени случаи кога е потребно треба да се разговара и со професионално лице. Доколку се одлучи да се прекине бременоста, тоа да се направи исклучиво во Болничка здравствена установа од страна на специјалист-гинеколог, со соодветна опрема и медицнски третман.
По презентацијата следуваше кратка дискусија помеѓу присутните и прашања поврзани со темата.

