Здружение за правна едукација и транспарентност СТАНИЦА ПЕТ Прилеп, во рамки на проектот „Паметно зелено село за одржлива иднина“, кој се реализира со поддршка од Фондации Отворено Општество – Западен Балкан, објавува:
ЈАВЕН ОГЛАС
За ангажирање на експерт од областа на енергетика за подготовка на Физибилити студија за утврдување на потенцијалот на с. Ропотово и околината за основање капацитет за производство на обновлива енергија (соларна фарма)
Општи информации за Проектот
Проектот „Паметно зелено село за одржлива иднина“ е насочен кон унапредување и промоција на концептот на праведна зелена транзиција во руралните области како значаен аспект од поширокиот концепт на социјална правда. Со наведената цел, проектот се стреми кон воспоставување на основи за одржливо земјоделство и употреба на обновливи извори на енергија на начин што е правичен и инклузивен, адресирање и поправање на историските нееднаквости што ги засегаат руралните заедници, како што се недоволно инвестирање, ограничен пристап до енергетската инфраструктура и повисоки нивоа на деградација на животната средина. Традиционално маргинализираните заедници, вклучително и луѓето кои живеат во руралните средини, се особено отпорни на воведување нови практики, особено онаа што вклучува употреба на земјиште и други природни ресурси, поради страв од присилна конфискација на земјиштето, наметнување на непознати и комплицирани практики што би можеле да ги ограничат во нивната основна приходна активност. Затоа, комбинирањето на активности кои придонесуваат за праведна зелена транзиција преку концептот на социјална правда помага да се овозможи руралните заедници да имаат корист од енергетската транзиција и дека нема да бидат изоставени.
Опис на активноста предмет на овој повик
Потребата од ангажманот е за имплементација на проектната компонента која се однесува на:
- Подготовка на физибилити студија која опфаќа техничка, економска и еколошка одржливост за соларна фарма во Ропотово
Студијата се однесува на утврдување на потенцијалот на с. Ропотово и околината за основање капацитет за производство на обновлива енергија (соларна фарма) и истата ќе ја изработат двајца експерти (експертот ангажиран со овој повик и уште еден експерт од областа на градежништво). Студијата треба да биде насочена кон одредување на клучните физибилити точки како што се: доволно просечни сончеви часови годишно, постоење и локација на големо, рамно земјиште со минимално засенчување, неподобно за земјоделска или конзерваторска употреба, непосредна близина до постоечката инфраструктура за пренос на електрична енергија, минимални еколошки ризици, поволни перспектива на заедницата и постоење на владина поддршка, како и утврдување на поволност на постоечката регулатива. Студијата треба да обезбеди сеопфатна проценка на соодветноста на Ропотово за соларна фарма, балансирајќи ги техничките, економските, еколошките и социјалните аспекти. По подготовката на студијата, експертот треба да учествува во завршен јавен настан за промовирање на наодите.
Времетраење и надоместок
Ангажманот за подготовка на студијата ќе биде за времетраење од 6 месеци во периодот јануари – јуни 2025 година. Завршниот настан за промовирање на наодите ќе се реализира во месец август 2025 година. За ангажманот е предвиден бруто надоместок од 1200 УСД во денарска противвредност.
Потребни квалификации
- Завршено високо образование (240 ЕКТС или VII-1 степен) од областа на енергетика/електротехника.
- Најмалку 2 години работно искуство на подготовка/имплементација на проекти поврзани со обновливи извори на енергија.
- Одлично познавање на методолошки и аналитички алатки и техники.
Пријавување
Пријавите кои вклучуваат лична биографија (CV), мотивационо писмо и финансиска понуда да се достават на емал адреса: [email protected] најдоцна до 31.12.2024 година.
Прилеп, 25.12.2024